İlin Yekunları

Azərbaycan Milli Kitabxanasının 2021-ci il fəaliyyəti haqqında

 Azərbaycan Milli Kitabxanası il ərzində öz fəaliyyətini Azərbaycan Respublikasının Prezidenti cənab İlham Əliyevin mədəniyyət, elm, təhsil, informasiya texnologiyaları və digər müvafiq sahələrə dair imzaladığı fərman və sərəncamlar, dövlət proqramları, Nazirlər Kabinetinin, Mədəniyyət Nazirliyinin qərarları, göstəriş və tapşırıqları, eləcə də mövcud qanunvericiliyə uyğun olaraq qurmuş, ölkədə elm, təhsil, mədəniyyətin inkişafı, milli-mənəvi dəyərlərimizin, kitab və mütaliənin təbliği ilə əlaqədar bir sıra əhəmiyyətli layihələr həyata keçirmiş, Azərbaycan gerçəkliklərinin dünyada tanıdılması istiqamətində mühüm nəticələrə nail olmuşdur.

Belə ki, Azərbaycan Respublikası Prezidenti cənab İlham Əliyevin “Azərbaycan Respublikasında 2021-ci ilin “Nizami Gəncəvi ili” elan edilməsi haqqında” 5 yanvar 2021-ci il tarixli sərəncamına, habelə Azərbaycan Respublikası Nazirlər Kabinetinin “Azərbaycan Respublikasında 2021-ci ilin “Nizami Gəncəvi İli” elan edilməsi haqqında” Azərbaycan Respublikası Prezidentinin 2021-ci il 5 yanvar tarixli 2408 nömrəli Sərəncamının icrasının təmin edilməsi barədə” 12 yanvar 2021-ci il tarixli 12s nömrəli sərəncamına müvafiq olaraq Milli Kitabxana tərəfindən ölkəmizdə və onun hüdudlarından kənarda geniş miqyaslı tədbirlər həyata keçirilmişdir.

2021-ci ilin “Nizami Gəncəvi ili” elan edilməsi ilə əlaqədar yanvarın 22-də Azərbaycan Milli Kitabxanasında “Nizami Gəncəvi İli”nin açılışı, Yevgeni Bertelsin “Böyük Azərbaycan şairi Nizami” və Milli Kitabxananın nəşr etdiyi “Azərbaycan əlyazmaları Praqa Milli Kitabxanasında” adlı qədim əlyazmalar kitab kataloqunun təqdimatı olmuşdur. “Böyük Azərbaycan şairi və mütəfəkkiri – Nizami Gəncəvi” mövzusunda geniş kitab sərgisinin təqdimatı keçirilmiş, “Nizami Gəncəvi-880” adlı daimi guşə yaradılmışdır. “Azərbaycanın görkəmli şəxsiyyətləri” seriyasından “Nizami Gəncəvi” adlı biblioqrafiya kitabı nəşr edilmiş, “Sözləri Nizaminindir” adlı CD disk albomu və “Nizami Gəncəvi – 880” adlı elektron daycest hazırlanmış, Nizami Gəncəvinin əsərlərinə çəkilmiş miniatürlər nəşr edilmiş, “Dahi Azərbaycan şairi Nizami Gəncəvi” adlı virtual sərgi, “Böyük Azərbaycan şairi Nizami Gəncəvi” və “Nizami Gəncəvi əlyazmaları dünya kitabxanalarında” adlı Elektron məlumat bazaları hazırlanaraq ictimaiyyətə təqdim edilmişdir.

Respublika Prezidenti tərəfindən 2021-ci ilin “Nizami Gəncəvi ili” elan edilməsi ilə əlaqədar olaraq Azərbaycan Milli Kitabxanası, Azərbaycan Respublikası Mədəniyyət Nazirliyi və TÜRKSOY Beynəlxalq təşkilatı birgə Ankarada TÜRKSOY-un iqamətgahında, İstanbulun Maltəpə Bələdiyyəsinin Türkan Saylan Mədəniyyət Mərkəzində “Dahi Azərbaycan şairi Nizami Gəncəvi” mövzusunda kitab və fotosərginin açılış mərasimlərini keçirmişdir. Tədbir çərçivəsində həm Ankarada, həm də İstanbulda Azərbaycan Milli Kitabxanasının fondunda mühafizə olunan Nizami əsərlərindən və onun haqqında ədəbiyyatdan ibarət geniş kitab sərgiləri təşkil olunmuşdur.

Azərbaycan Milli Kitabxanasının “Nizami Gəncəvi ili” çərçivəsində həyata keçirdiyi ən əhəmiyyətli layihə Mədəniyyət Nazirliyi, Heydər Əliyev fondu ilə birgə həyata keçirdiyi “Milli mənəvi dəyərlərimizin Vətənə qayıdışı” layihəsi çərçivəsində Nizami Gəncəvinin 880 illik yubileyi ilə əlaqədar dünya kitabxanalarında və muzeylərində mühafizə olunan Nizami Gəncəvi əlyazmalarının rəqəmsal nüsxələrinin Azərbaycana gətirilməsinin təmin edilməsi olmuşdur. Bu tədbirlər nəticəsində indiyədək Azərbaycan elminə və alimlərinə məlum olmayan nüsxələrin də yer aldığı 156 Nizami əlyazmalarının rəqəmsal surətləri Azərbaycana gətirilmişdir. Belə ki, Milli Kitabxana Mədəniyyət Nazirliyi ilə birgə ilk dəfə olaraq “Milli Mədəni dəyərlərimizin Vətənə Qayıdışı” layihəsi çərçivəsində Türkiyə, ABŞ, Almaniya, Fransa, Britaniya, Polşa, Çexiya, Rusiya, Qazaxıstan və digər ölkələrin kitabxana və muzeylərindən Nizami əlyazmalarının rəqəmsal nüsxələrini əldə etmişdir. Həmin əlyazmaların köçürülmə tarixi və tərtibatı nəzərə alınaraq bəziləri orijinallığı qorunaraq 1 nüsxə çap edilərək Milli Kitabxananın “Nadir kitablar” fonduna verilmişdir. Milli Kitabxananın fonduna daxil olan Nizami əlyazmalarının əksəriyyəti bugünədək respublika elminə məlum olmayan əlyazmalardır və onların hər biri ədəbiyyatşünas alimlərimizin tədqiqat mövzusu olacaqdır.

Eyni zamanda Bakı şəhərində oktyabrın 6-dan 10-dək Azərbaycan Respublikası Mədəniyyət Nazirliyinin təşkilatçılığı ilə Bakı Ekspo Mərkəzində Nizami Gəncəvinin 880 illik yubileyinə həsr olunan VII Bakı Beynəlxalq Kitab Sərgi-Yarmarkası keçirilmişdir. Sərgi-yarmarka çərçivəsində Azərbaycan Milli Kitabxanası da bir sıra tədbirləri – “Nizami Gəncəvi əlyazmaları dünya kitabxanalarında” mövzusunda sərginin açılışı və eyniadlı Elektron Məlumat bazasının təqdimatı; Azərbaycan Milli Kitabxanası ilə M.İ.Rudomino adına Ümumrusiya Dövlət Xarici Ədəbiyyat kitabxanası və Əlişir Nəvai adına Özbəkistan Milli Kitabxanası arasında qarşılıqlı əməkdaşlığa dair memorandumların imzalanması; “Nizami Gəncəvi. Biblioqrafiya” kitabının və “Sözləri Nizaminindir” adlı CD disk albomunun təqdimatı; Milli Kitabxanada Bolqarıstana və Gürcüstana dair daimi guşələrin açılışı; “VII Bakı Beynəlxalq Kitab Sərgi-Yarmarkasında iştirakçı xarici ölkə kitabxanaları tərəfindən sərgidə nümayiş olunan kitabların Azərbaycan Milli Kitabxanasına hədiyyə edilməsi mərasimi”, “Qarabağa kitabla gedək” layihəsinin təqdimatını təşkil etmişdir.

VII Bakı Beynəlxalq Kitab Sərgi-Yarmarkası tədbirlərində Azərbaycan Milli Kitabxanasının dəvəti ilə gələn Rusiya, Bolqarıstan, Özbəkistan, Qırğızıstan, Gürcüstan milli kitabxanalarının əməkdaşları öz ölkələrinə dair ekspozisiya ilə təmsil olunmuşlar.

Cari ilin 15-25 noyabr tarixlərində Bakıda Nizami Gəncəvi Beynəlxalq Festivalı da keçirilmişdir. Festival tədbirləri zamanı Milli Kitabxana da bir sıra tədbirlərin – Milli Kitabxanada keçirilən “Nizami Gəncəvinin əsərlərinə çəkilmiş miniatürlərdən ibarət sərginin” və “Sözləri Nizaminindir” adlı ədəbi-bədii qiraət və musiqi kompozisiyası, kitabxananın hazırladığı eyniadlı disk albomunun təqdimatının; Beynəlxalq Muğam Mərkəzində TÜRKSOY-un nəşr etdiyi “Nizamini oxuyaq” (Reading Nizami Ganjavi) və Azərbaycan Milli Kitabxanasının nəşr etdiyi “Nizami Gəncəvi. Biblioqrafiya” kitablarının təqdimat mərasiminin təşkilatçılarından biri olmuş və “Nizami Gəncəvi: Mədəniyyətlər arasında körpü” mövzusunda keçirilən Nizami Gəncəvi Beynəlxalq Forumu zamanı “Nizami Gəncəvi əlyazmaları dünya kitabxanalarında”, “Böyük Azərbaycan şairi Nizami Gəncəvi” və “Nizami Gəncəvinin əsərlərinə çəkilmiş miniatürlər”dən ibarət sərgilər ilə təmsil olunmuşdur.

Eyni zamanda Azərbaycan  Respublikasının  Prezidenti  cənab İlham  Əliyevin görkəmli şəxsiyyətlərin yubileylərinin qeyd olunması barədə sərəncamlarına müvafiq olaraq Milli Kitabxanada “Azərbaycanın görkəmli şəxsiyyətləri” seriyasından “Lütfi Zadə” adlı biblioqrafiya kitabı nəşrə hazırlanmış, Lütfi Zadənin həyat və yaradıcılığını əhatə edən “Qeyri-səlis məntiq nəzəriyyəsinin banisi – Lütfi Zadə” adlı Elektron məlumat bazası  və “Lütfi Zadə – 100” adlı virtual sərgi hazırlanaraq onlayn rejimdə oxuculara təqdim edilmişdir. Həmçinin, “Azərbaycanın görkəmli şəxsiyyətləri” seriyasından “Aşıq Ələsgər” adlı biblioqrafiya kitabı nəşr edilmiş, “Aşıq Ələsgər – 200” adlı virtual daycest hazırlanmış, “Aşıq Ələsgər – 200” adlı virtual sərgi və “Ustad sənətkar Aşıq Ələsgər” adlı Elektron məlumat bazası hazırlanaraq onlayn rejimdə istifadəçilərə təqdim edilmiş, Şuşa şəhərinin Azərbaycanın mədəniyyət paytaxtı elan edilməsi haqqında Azərbaycan Respublikası Prezidentinin Sərəncamına müvafiq olaraq, eləcə də Şuşanın işğaldan azad edilməsinin ilk ildönümü münasibətilə “Şuşa bizimdir! Qarabağ Azərbaycandır” adlı virtual sərgi hazırlanaraq istifadəçilərə onlayn təqdim olunmuş və “Şuşa – Azərbaycanın mədəniyyət paytaxtı” adlı fundamental biblioqrafiya hazırlanaraq nəşr olunmuşdur. Mikayıl Abdullayevin 100 illik yubileyi ilə bağlı “Azərbaycanın görkəmli şəxsiyyətləri” seriyasından “Mikayıl Abdullayev” adlı biblioqrafiya nəşrə hazırlanmış, “Xalq rəssamı – Mikayıl Abdullayev” adlı Elektron məlumat bazası və “Mikayıl Abdullayev – 100” adlı virtual sərgi hazırlanaraq onlayn rejimdə oxuculara təqdim edilmiş, eləcə də Kamil Əliyevin 100 illik yubileyi ilə əlaqədar “Xalq rəssamı Kamil Əliyev – 100” adlı Elektron məlumat bazası və “Kamil Əliyev – 100” adlı virtual sərgi hazırlanaraq onlayn rejimdə oxuculara təqdim edilmişdir.

2020-ci il Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi ilə müzəffər Azərbaycan ordusu tərəfindən 44 günlük müharibə nəticəsində erməni işğalından azad olunmuş ərazilərimizdə 90-cı illərin əvvəllərinədək fəaliyyət göstərmiş kitabxanaların kitab fondlarının bərpası ilə əlaqədar Mədəniyyət Nazirliyi ilə Milli Kitabxana birgə kitabtoplama kampaniyasına “Qarabağa kitabla gedək!” layihəsinə başlamışdır. Bu məqsədlə, layihəyə bir çox ziyalılarımız, alimlərimiz, müxtəlif təşkilatlar, eləcə də adi vətəndaşlar qoşulmuş və nəticədə 60 282 nüsxə kitab toplanmışdır.  

Cari ilin oktyabr ayına kimi Milli Kitabxana dünyanı cənginə alan koronavirus pandemiyası səbəbindən onlayn formada fəaliyyət göstərmişdir. Bu baxımdan, Milli Kitabxana da istər ölkədaxili, istərsə də dünya miqyasında keçirilən onlayn tədbirlərin iştirakçısı olmuşdur: “Mədəniyyət Nazirliyinin təşkilatçılığı ilə keçirilən Kitabxana və nəşriyyat-poliqrafiya müəssisələri ilə onlayn videokonfrans”, “TÜRKSOY Beynəlxalq təşkilatının “Türksoy Kitabxanası” seriyasından nəşr etdiyi Türkiyəli şair Kənan Çarboğanın “Qorqudnamə” kitabının onlayn təqdimat mərasimi”, “Milli Kitabxananın təşkilatçılığı ilə Azərbaycan Respublikası Mədəniyyət Nazirliyinin tabeliyində olan kitabxanaların iştirakı ilə Xocalı soyqırımının 29-cu ildönümünə həsr olunmuş “Xocalı soyqırımı – 29” adlı videokonfrans və Əliağa Cəfərovun Türkiyədə nəşr edilmiş “Katliam” adlı kitabının onlayn təqdimatı”, “Kitabxanalar birliyi: Uzunmüddətli tərəfdaşlığın nailiyyətləri və perspektivləri” mövzusunda Beynəlxalq Forum”, “Milli Kitabxananın təşkilatçılığı ilə Nizami Gəncəvinin əlyazmaları dünya kitabxanalarında mövzusunda videokonrans”, “Əhməd Zəki Validi adına Başqırdıstan Milli Kitabxanasının 185 illiyinə həsr olunmuş “Kitabxanalar mədəniyyət məkanında: ənənələr və yeniliklər” adlı Beynəlxalq Elmi və Praktik Konfrans”, “İqtisadi Əməkdaşlıq Təşkilatına üzv ölkələrin Milli Kitabxana direktorlarının V virtual iclası”, “CENL Beynəlxalq Təşkilatının Mədəni proqramlaşdırma mövzusunda təşkil etdiyi onlayn vebinar”.

Eyni zamanda Milli Kitabxanada “Xalq yazıçısı Elçinin işğaldan azad olunan kitabxanaların fondu üçün kitab hədiyyəetmə mərasimi”, “Xalq yazıçısı, Əməkdar elm xadimi, akademik Kamal Abdullanın anadan olmasının 70 illiyi münasibətilə Türkiyədə nəşr olunmuş “Mitolojinin Elçisi, Kamal Abdulla Armağanı” adlı kitabın təqdimat mərasimi”, “Nizami Gəncəvi Beynəlxalq Mərkəzi və Milli Kitabxana birgə Nizami Gəncəvi Beynəlxalq Mərkəzinin ingilis dilində nəşr etdiyi “The interpretation of Nizami’s cultural heritage in the contemporary period” (Müasir dövrdə Nizami mədəni irsinin təfsiri) adlı kitabın təqdimat mərasimi”, “Ümumdünya Kitab və Müəlliflik Hüququ günü ilə əlaqədar Azərbaycan Respublikasının Mədəniyyət Nazirliyi və Milli Kitabxananın birgə təşkil etdiyi “Cəmiyyətin intellektual inkişafında kitab və mütaliənin rolu” mövzusunda konfrans”, “Azərbaycan xalqının Ümummilli lideri Heydər Əliyevin doğum günü ilə əlaqədar Azərbaycan Respublikası Mədəniyyət Nazirliyi, YAP Səbail rayon təşkilatı və Milli Kitabxananın birgə təşkil etdiyi “Ulu Öndər Heydər Əliyevin həyatında kitab və mütaliənin rolu” mövzusunda tədbir və BDU-nun dosenti R.Süleymanovun “Ulu Öndər Heydər Əliyev və Azərbaycan kitab mədəniyyəti” kitabının təqdimat mərasimi”, “Azərbaycan Respublikasının Mədəniyyət Nazirliyi, Milli Məclisin Mədəniyyət Komitəsi, YAP Səbail rayon təşkilatı və Milli Kitabxananın birgə təşkilatçılığı ilə “Milli Qurtuluş günü”nə həsr olunmuş tədbir və Əməkdar elm xadimi, professor Qəzənfər Paşayevin “Xilaskarlar” kitabının təqdimat mərasimi”, “Nizami Gəncəvi və Yunus Əmrə: ortaq milli dəyərlərimiz” mövzusunda dəyirmi masa və Avtomatlaşdırılmış Kitabxana İnformasiya Sistemləri, Beynəlxalq Kitab Eyniləşdirmə standartları (İSBN, İSSN və s.) haqqında təcrübə mübadiləsi ilə əlaqədar işgüzar görüş”, “Mədəniyyət Nazirliyi və Milli Kitabxananın “Milli Musiqi xəzinəmizdən (Azərbaycan Milli Kitabxanasının fondundan)” mövzusunda həyata keçirdiyi birgə layihə çərçivəsində son iki ildə nəşr olunmuş Azərbaycan bəstəkarlarının not məcmuələrinin (cəmi 40 məcmuə) təqdimat mərasimi”, “Mədəniyyət Nazirliyi, Bəstəkarlar İttifaqı və Milli Kitabxananın birgə təşkilatçılığı ilə Tofiq Bakıxanovun nəşr olunmuş əsərlərindən ibarət sərginin açılışı” olmuşdur.

Milli Kitabxana xaricdə keçirilən bir sıra beynəlxalq tədbirlərin də iştirakçısı olmuşdur: “MDB-yə Üzv Dövlətlərinin Dövlətlərarası Humanitar Əməkdaşlıq Fondunun, Qırğızıstan Respublikası Hökumətinin, Bölgələrarası Kitabxana Əməkdaşlıq Mərkəzinin, “Hər kəs üçün məlumat” - YUNESKO-nun Rusiya Komitəsinin, A.Osmonov adına Qırğızıstan Respublikasının Milli Kitabxanasının və Qırğızıstan Respublikasının Kitabxanalar Birliyinin təşkil etdiyi “Rəqəmsal dövrdə kitab və mütaliə” mövzusunda Qırğızıstan Respublikasında keçirilən II Beynəlxalq Konfrans”, “Düşənbədə keçirilən “Müstəqil Dövlətlər Birliyi kitabxanalarının üç onillik tərəfdaşlığı: istinadlar və inkişaf strategiyaları” adlı kitabxanaçıların beynəlxalq konfransı”, “Sofiya şəhərində yerləşən Müqəddəs Kiril və Mefodi adına Bolqarıstan Milli Kitabxanasında Azərbaycana dair daimi guşənin açılış mərasimi”, “Bolqarıstana Kitabxana Elmləri və İnformasiya texnologiyaları Universiteti ilə Azərbaycan Milli Kitabxanası arasında ikitərəfli əməkdaşlığa dair memorandum imzalanma mərasimi”, “CENL – Avropa Milli Kitabxanaları Konfransının illik iclası”.     

Milli Kitabxana 27 sentyabr Anım günü və 8 noyabr Zəfər gününün qeyd edilməsi ilə bağlı bir sıra tədbirləri təşkil etmişdir: “Şəhidlərimizi ehtiramla yad edirik!”; “8 Noyabr – Zəfər Günü” adlı elektron metodik vəsaitlər; “Şuşa – Azərbaycanın mədəniyyət paytaxtı: Biblioqrafiya” hazırlanmış, eləcə də “Vətən müharibəsi qəhrəmanları unudulmur” adlı virtual sərgi və “Qarabağ Azərbaycandır! – 44 günlük II Qarabağ müharibəsi” adlı Elektron məlumat bazası hazırlanaraq istifadəçilərə təqdim olunmuşdur. Həmçinin, Milli Kitabxanada ““TÜRKSOY Media mükafatı” təqdim olunmuş media nümayəndələrinin Milli Məclisin Mədəniyyət Komitəsinin sədri Qənirə xanım Paşayeva ilə görüşü”; ““Xatirə Kitabı: 44 gün – Tarixi Zəfər” kitabının təqdimat mərasimi”; ““Vətən müharibəsinin möhtəşəm zəfəri” adlı tədbir və “Qarabağ dastanı: Otuz ilin həsrəti – 44 günün zəfəri”, “Şuşa – Azərbaycanın mədəniyyət paytaxtı: Biblioqrafiya” kitablarının təqdimat mərasimi” keçirilmişdir.

Cari ildə Azərbaycan Milli Kitabxanası bir sıra ölkələrin kitabxanaları ilə – İran İslam Respublikasının Milli Kitabxana və Arxivi; M.İ.Rudomino adına Ümumrusiya Dövlət Xarici Ədəbiyyat kitabxanası; Əlişir Nəvai adına Özbəkistan Milli Kitabxanası; Müqəddəs Kiril və Mefodi adına Bolqarıstan Milli Kitabxanası; eləcə də Bolqarıstan Kitabxana Elmləri və İnformasiya texnologiyaları Universiteti ilə qarşılıqlı əməkdaşlığa dair müqavilələr imzalamışdır.

Nazirlər Kabinetinin 24 sentyabr 2021-ci il tarixli 280 nömrəli “Xüsusi karantin rejimində bəzi məhdudiyyətlərin aradan qaldırılması ilə bağlı əlavə tədbirlər barədə” qərarından sonra isə Milli Kitabxana oktyabr ayının 1-dən tam şəkildə daimi işlədiyi qrafik üzrə (bilavasitə kitabxana binasında) oxuculara xidmət etməyə başlamışdır.

Milli Kitabxana eyni zamanda oxucu zallarının ümumi tutumunun 50 faizindən çox olmamaqla oxuculara xidmət etmiş və yalnız COVID-19 pasportu olan şəxslər (yaşı 18-dən aşağı olan şəxslər istisna olmaqla) və ya COVID-19-a qarşı immunitet sertifikatı olan şəxslər kitabxanaya buraxılmışdır.

Cari ildə Milli Kitabxananın nəşriyyat fəaliyyəti də qənaətbəxş olmuşdur. Kitabxana tərəfindən müəllifi Ə.İsmayılova olan pandemiya dövründə kitabxananın fəaliyyətini əks etdirən “Azərbaycan Milli Kitabxanasında koronavirus (COVİD-19) pandemiyası şəraitində elektron informasiya xidmətinin təşkili” (azərbaycan və rus dillərində) adlı kitab, “Azərbaycan nəfəsli əlyazmalar Praqa Milli Kitabxanasında: Kataloq”, “Əlamətdar və tarixi günlər təqvimi – 2022”, “Azərbaycanın görkəmli şəxsiyyətləri” seriyasından “Nizami Gəncəvi”, “Aşıq Ələsgər”, “Xan Şuşinski”, “Seyran Səxavət” və Şuşa şəhərinin işğaldan azad olunmasının ilk ildönümünə həsr edilən “Şuşa – Azərbaycanın mədəniyyət paytaxtı” adlı fundamental biblioqrafiyalar nəşr olunmuşdur. Həmçinin, “Azərbaycanın görkəmli şəxsiyyətləri” seriyasından “Lütfi Zadə”, “Mikayıl Abdullayev”, “Kərim Tahirov”, “Akademik Mirzə İbrahimov”, “Əzizə Cəfərzadə”, “Sabir Rüstəmxanlı”, “Abbas Zamanov”, “Əlibaba Məmmədov” adlı biblioqrafiyalar, eləcə də “Yeni kitablar 2020: Annotasiyalı biblioqrafik göstərici № 2-4”, “Yeni kitablar 2021: Annotasiyalı biblioqrafik göstərici № 1”, “Birillik Azərbaycan Kitabiyyatı – 2020”, “Azərbaycan kitabı. Biblioqrafiya:  10 cilddə. VI cild (1971-1980)” kitabları nəşrə hazırlanmışdır. Eyni zamanda Milli Kitabxana elektron bazaya daxil edilən materiallar əsasında mədəniyyət, incəsənət, bədii ədəbiyyat və ədəbiyyatşünaslığa aid materialları toplayaraq “Mədəniyyət, incəsənət, bədii ədəbiyyat və ədəbiyyatşünaslıq haqqında yeni ədəbiyyat” adlı cari biblioqrafik informasiya göstəricisinin nəşrini davam etdirmişdir. Hesabat ilində Milli Kitabxana Mədəniyyət Nazirliyi ilə birgə “Milli musiqi xəzinəmizdən (Azərbaycan Milli Kitabxanasının fondundan)” layihəsi çərçivəsində Azərbaycan bəstəkarlarının ötən əsrin 40-80-ci illərində Moskvada və Bakıda nəşr olunan və Milli Kitabxananın fondunda mühafizə olunan not musiqi məcmuələrinin yenidən nəşr olunaraq respublikamızın musiqi məktəblərinə, kolleclərinə və kitabxanalarına göndərilməsini nəzərdə tutan layihənin icrasını davam etdirmişdir. Layihə üzrə görkəmli Azərbaycan bəstəkarlarından Musa Mirzəyevin “Gənclik albomu” və “Konsert pyesləri”, Oqtay Rəcəbovun “İki sonatina” və “On dörd miniatür”, Məmməd Nəsirbəyovun “Sonatina” və “Uşaq pyesləri”, Azər Dadaşovun “Fortepiano əsərləri”, Niyazinin “Fortepiano əsərləri”, Soltan Hacıbəyovun ““Gülşən” baletindən seçilmiş parçalar”, Cövdət Hacıyevin “Fortepiano əsərləri”, Üzeyir Hacıbəylinin “Fortepiano əsərləri”, Sərdar Fərəcovun “Variasiyalar”, Asəf Zeynallının “Fortepiano üçün əsərlər”, “Vətənpərvərlik mahnıları: (səs və fortepiano üçün)” adlı fortepiano üçün əsərləri nəşr olunaraq musiqi məktəblərinin müəllim və tələbə heyətinin, kitabxanaların istifadəsinə verilmişdir.

2021-ci ildə Milli Kitabxananın fonduna müxtəlif mənbələrdən 20206 nüsxə  ədəbiyyat daxil olmuşdur. Daxil olmuş ədəbiyyatın 10819 nüsxəsi azərbaycan, 9387 nüsxəsi isə digər dillərdə olmuşdur.

Hal-hazırda Milli Kitabxananın fondu 4.629.442 nüsxə təşkil edir. Hesabat ilində Milli Kitabxanada tammətnli elektron resursların yaradılması işi də qənaətbəxş olmuşdur. Pandemiya dövrünün yaratdığı maneələrə baxmayaraq Milli Kitabxanada robot skanerlər, portativ skanerlər və rəqəmsal fotoaparatlar vasitəsi ilə çəkilmiş və qrafik proqramlarda işlənmiş 48814 tammətnli elektron resurs hazırlanmışdır. Bunlar 6486 tammətnli E-kitabı, 11531 tammətnli E-dövri-mətbuatı, 639 tammətnli E-dissertasiyanı  və  30158 tammətnli analitik biblioqrafik resursu əhatə edir. Hal-hazırda kitabxananın elektron bazasında cəmi 1.377.658 elektron resurs mövcuddur. Həmçinin, hesabat ili ərzində Milli Kitabxanada 25 adda Elektron məlumat bazası, 92 adda elektron virtual sərgi hazırlanaraq onlayn rejimdə istifadəçilərə təqdim olunmuşdur.

İl ərzində Ölkədaxili Kitab mübadiləsi fondundan 13572 nüsxə kitab və jurnal Bakı şəhəri, rayon kitabxanalarına və digər müəssisə və təşkilatlara göndərilmişdir. İl ərzində Milli Kitabxanaya xarici ölkə kitabxanalarından 995 nüsxə ədəbiyyat daxil olmuş, eyni zamanda Azərbaycan həqiqətlərini dünya ictimaiyyətinə təqdim etmək üçün tariximizə, mədəniyyətimizə, iqtisadiyyatımıza, daxili və xarici siyasətimizə, Dağlıq Qarabağ məsələsinə və digər mühüm sahələrə dair 1787 nüsxə ədəbiyyat dünyanın milli kitabxanalarına, səfirliklərə, universitetlərə  göndərilmişdir.

Pandemiya şəraiti ilə əlaqədar kitabxananın oxucular üçün bağlanması səbəbindən istifadəçilərə kitabxana-informasiya xidmətini virtual rejimdə təqdim etmək üçün yaradılan “Onlayn xidmətlər” pəncərəsi (“Biblioqrafik sorğu”, “Sənədlərin sifarişi və elektron çatdırılması”, “Metodiki xidmət”, “Virtual sərgi”) cari ildə də aktiv olmuşdur. Cari ildə “Sənədlərin sifarişi və elektron çatdırılması” bölməsi vasitəsilə 147219 istifadəçiyə 170575 resurs göndərilmişdir.                                          

Cari ildə Milli Kitabxananın (millikitabxana.az) saytına daxil olanların sayı   7.500.523 nəfər olmuşdur.

Hesabat ili ərzində kitabxanada oktyabrın 1-dən ilin sonunadək ənənəvi oxucu davamiyyəti 75004, ədəbiyyat verilişi isə 309146 olmuşdur.

İl ərzində Milli Kitabxanada 24 şöbədə 339 nəfər işçi çalışmışdır ki, bunlar həm yerli, həm də xarici beynəlxalq treninq, seminar, vorkşop və digər tədbirlərdə müntəzəm şəkildə iştirak edir, bilik, bacarıq və səriştələrini artırır, yeni qabaqcıl təcrübə əldə edirlər.

2021-ci ildə Azərbaycan Respublikası Mədəniyyət Nazirliyinin Milli Kitabxanada fəaliyyət göstərən Ekspert Komissiyası tərəfindən çap məhsullarının ölkədən çıxarılmasına 3 icazə sertifikatı: sərgidə nümayiş olunan ədəbiyyatlar üçün (qaytarılmaq şərtilə) 1 sertifikat, tədbirlərdə nümayiş olunmaq və paylanmaq üçün isə (qaytarılmamaq şərtilə) 2 sertifikat verilmişdir.