Xəbərlər

2 oktyabr tarixində XI Bakı Beynəlxalq Kitab Sərgisi çərçivəsində Azərbaycan Milli Kitabxanası ilə Türkiyə Cümhurbaşqanlığı Millət Kitabxanası arasında ikitərəfli, həmçinin Azərbaycan Milli Kitabxanası, AMEA-nın Məhəmməd Füzuli adına Əlyazmalar İnstitutu və Mərakeş Milli Kitabxanası arasında üçtərəfli Əməkdaşlıq Memorandumunun imzalanması mərasimi keçirilib.

Tədbirdə AMEA-nın prezidenti akademik İsa Həbibbəyli, AMEA-nın Məhəmməd Füzuli adına Əlyazmalar İnstitutunun direktoru akademik Teymur Kərimli, AMEA-nın MEK-nın direktoru texnika elmləri doktoru, dosent Hüseyn Hüseynov, Türkiyənin Azərbaycandakı səfirliyinin mədəniyyət və tanıtım müşaviri Muhittin Macit, Türkiyə Cümhurbaşqanlığı Millət Kitabxanasının rəhbəri Ayhan Tuğlu, Mərakeş Krallığının Azərbaycandakı fövqəladə və səlahiyyətli səfiri Məhəmməd Adil Embarş, Mərakeş Krallığının Milli Kitabxanasının direktoru Samira El Malizi və aidiyyəti şəxslər iştirak ediblər.

Tədbiri Milli Kitabxananın direktoru professor Kərim Tahirov açaraq qonaqları salamlayıb. O, Azərbaycan Milli Kitabxanasının bu günədək dünyanın 54 ölkəsinin Milli Kitabxanaları ilə əməkdaşlıq haqqında memorandum imzaladığını qeyd edib. Bildirib ki, bu gün  imzalanacaq memorandumlar həm Türkiyə Cümhurbaşqanlığı Millət Kitabxanası ilə ikitərəfli, həm də Mərakeş Krallığının Milli Kitabxanası və AMEA-nın M.Füzuli adına Əlyazmalar İnstitutu ilə üçtərəfli fəal qarşılıqlı əməkdaşlıq əlaqələrinin qurulmasına xidmət edir. Əməkdaşlıq memorandumlarının kitab və informasiya mübadiləsinə, ədəbiyyat guşələrinin yaradılmasına, elektron nəşrlər və məlumat bazalarının istifadəsinə, mütəxəssislərin təcrübə mübadiləsinə, qarşılıqlı kitab sərgilərinin və konfransların təşkilinə, eləcə də oxuculara onlayn xidmətlərin göstərilməsi sahəsində geniş imkanlar açdığını söyləyib.

Türkiyə Cümhurbaşqanlığı Millət Kitabxanasının rəhbəri Ayhan Tuğlu çıxışında imzalanan əməkdaşlıq memorandumu haqqında danışaraq, onun hər iki ölkənin kitabxanaları arasında müxtəlif sahələrdə əlaqələrin inkişafına mühüm töhfə verəcəyini vurğulayıb.

AMEA-nın prezidenti, akademik İsa Həbibbəyli Beynəlxalq Kitab Sərgisi çərçivəsində imzalanma mərasimlərinin keçirilməsinin dünyanın müxtəlif ölkələri ilə mədəniyyət, elm və təhsil sahələrində beynəlxalq əlaqələrin genişlənməsinə mühüm töhfə verdiyini vurğulayıb. O, sivilizasiyaların əsas mərkəzlərindən biri olan Mərakeşin zəngin kitabxana ənənələri ilə Azərbaycan Milli Kitabxanası və AMEA-nın M.Füzuli adına Əlyazmalar İnstitutu arasında əməkdaşlıqda yeni bir mərhələnin başlanğıcı olduğunu qeyd edib. Bildirib ki, əlyazmaların qarşılıqlı mübadiləsi və tədqiqatçılar üçün istifadəyə açılması hər iki ölkənin alimləri üçün geniş elmi imkanlar yaradacaq, eyni zamanda qarşılıqlı əməkdaşlığı daha da gücləndirəcək.

Mərakeş Krallığının Milli Kitabxanasının direktoru Samira El Malizi  hər kəsi salamlayaraq əməkdaşlıq memorandumunun imzalanmasına verdikləri dəstəyə görə, Azərbaycan Milli Kitabxanasının direktoru professor Kərim Tahirova, AMEA-nın prezidenti akademik İsa Həbibbəyliyə, və Mərakeş Krallığının ölkəmizdəki səfiri Məhəmməd Adil Embarşa minnətdarlığını bildirib. Kitabxanaların xalqlar arasında körpü rolunu oynadığını, bu üçtərəfli əməklaşlıq memorandumunun gələcəkdə birgə lahiyələrə, sərgilərə, elmi araşdırmalara yeni imkanlar açacağını söyləyib.

Sonra əməkdaşlıq memorandumları imzalanıb. Əvvəlcə Azərbaycan Milli Kitabxanası ilə Türkiyə Cümhurbaşqanlığı Millət Kitabxanasının arasında ikitərəfli əməkdaşlıq memorandumu imzalanıb. Daha sonra  Azərbaycan Milli Kitabxanası, AMEA-nın Məhəmməd Füzuli adına Əlyazmalar İnstitutu və Mərakeş Krallığının Milli Kitabxanası arasında  üçtərəfli əməkdaşlıq memorandumu imzalanıb.

İmzalanma mərasimindən sonra xatirə şəkilləri çəkdirilib.